Maumpisa ‘las 10 sang aga, Lunes, Abril 13 (Eastern Time) ukon ‘las 10 sang gab-i naman karon sa Pilipinas, ang pagbalabag sang Estados Unidos sang Amerika sa mga barko nga masulod kag maguwa sa Iranian ports kasunod sang mandu ni US President Donald Trump.
Suno sa U.S. Central Command, ang pagsulondan ipatuman sa tanan nga barko, sa diin man nga pungsod ini halin kun magsulod mismo ukon magguwa sa mga pwerto sang Iran lakip na ang sa Arabian Gulf kag Gulf of Oman.
Apang gin-athag man sini nga pahanugotan nga makalabay sa Strait of Hormuz ang mga barko nga indi man magpadulong sa Iran.
Ginpasalig sang US nga ang amo nga tikang ang indi makaapekto sa normal nga paglabay sang mga barko.
Ang nasambit nga anunsyo ginhimo matapos ginpahayag ni Trump nga may blockade nga himuon sa Strait of Hormuz.
Ginalantaw nga ang amo nga tikang ang mahimo makapataas pa gid sa presyo sang gatong samtang ginahugtan sang US ang Iran.
Bilang sabat, ginpahayag naman sang parliament speaker sang Iran nga si Mohammad Bagher Ghalibaf nga i-enjoy na sang mga Americans ang presyo sang gatong subong bangud sigurado nga magamahal pa ang presyo sa mga masunod nga semana.
