ROXAS CITY – Nagalaum ang Sangguniang Panlalawigan nga sa pagpungko sang bag-o nga administrasyon maga-improbar ang pagserbisyo sang Roxas Memorial Provincial Hospital (RMPH) sa mga pumuluyo nga nagakinahanglan sa probinsya sang Capiz.
Ini ang ginpahayag ni Board Member Jonathan “Sonny” Besa, sang mainterview sang Bombo Radyo.
Suno kay Besa, kinahanglan nga hatagan sang igtalupangod ang nagakatalabo nga anomalya sa sulod sang ospital bangud ang RMPH amu ang salandigan sang mga pumuluyo ilabi na ang mga kubos.
Sa ginhiwat nga diyalogo sang mga empleyado sang RMPH kaupod ang SP, Vice Governor James Mitang Magbanua kag Governor-elect Fredenil “Oto” Castro, napalab-ot ang mga workers sang ila hibubun-ot natuhoy sa wala nabaton nga sweldo sang nanligad nga tuig kun sa din nagpromisa si Governor-elect Castro nga sa iya pagpungko igahatag sini ang sweldo sang mga empleyado sang Nobyembre kag Disyembre.
Ginpahayag ni BM Besa, nga madamo sang dapat nga tadlungon sa pagdumala sang ospital kasubong na lamang sa pagtratar sang abusador nga mga empleyado sa mga pumuluyo, kakulangan sang suplay sang bulong kag kagamitan.
Ginasiguro man sini nga mahatagan sang nagakaigo nga sweldo ang mga trabahante sang nasambit nga ospital kag ginrekomendar ang pagpataas ilabi na sa mga casual workers, job orders kag nagaduty sa COVID ward.
Kaangot diri magapatigayon naman ang SP sang imbestigasyon sa anomalya nga nagakalatabo sa ospital kag pagapasakaan sang nagakaigo nga panumbungon ang mapamatud-an nga nag-abusar sa RMPH.
Ginklaro man sang opisyal nga wala sini ginahingabot ang administrasyon ni Contreras kag ang tuyo lamang sini ang ikaayo sang pumuluyo sang probinsya.
Samtang, nagadihon na sang tikang ang SP kaupod ang Capiz Medical Society agud malikawan ang paglapta sang COVID-19 ilabi na subong nga may yara sang pagpamahog sang monkeypox virus.
