ROXAS CITY – Wala naglain ang buot ni board member Jonathan ‘Sonny’ Besa kun wala magtambong ang mayorya sa mga Barangay Kapitan sa ila banwa sa Panay, sa imbetasyon nga pakigsinapol kaupod si Governor-elect Fredenil ‘Oto’ Castro.
Ini ang ginpahayag ni board member Besa, sang mainterview sang Bombo Radyo.
Sa baylo, suno diri nga nakanugonan kag nagakalisod ini bangud para kuntani sa ikaayo sang ila banwa ang amu nga pakighinala sa masunod nga gobernador sang probinsya.
Nahibaluan nga gintugyanan ni Besa ang Liga President sa Panay nga si SB Member-elect kag Punong Barangay Rogelio Besorio nga ipalab-ot sa mga Barangay Kapitan ang imbetasyon ni Castro.
Apang, sa 42 nga mga Kapitanes, 11 lang diri ang nagtambong sa amu nga pagsinapol.
Ginpanginwala man ni Besa nga isa ka sahi sang pagpangbastos kay Mayor-elect Vicente Bermejo ang pagpaagi sang imbetasyon sa Liga President sa baylo nga sa alkalde.
Suno diri, wala sini ginpaagi sa Mayor kag Vice Mayor-elect ang imbetasyon bangud posible nga paga-imbetaron lang nila ang apin nga kapitan, gani si Liga President Besorio ang iya ginlab-ot agud tanan nga mga Kapitan ang paga-imbetaran, bangud sa iya nga obligasyon.
Sa pihak nga bahin, gindayaw ni Besa ang ginpakita nga suporta sang mga taga-Pontevedra bangud sa 26 ka mga kabarangayan, tanan nga Punong Barangay ang nagtambong sa kaangay nga pagsinapol.
