ROXAS CITY – Ginkumpirma sang chairman sang Committee on Environment sa Sangguniang Panlalawigan nga indi siya makaupod sa iban nga mga board members nga magapadulong sa Davao City agud didto patigayunon ang Strategic Planning seminar kag Executive Legislative Agenda (ELA).
Ginpahayag ni Board Member Matthew Hachuela nga may nauna na ini nga commitment nga nahanduan antes pa man nabaton ang komunikasyon angut sa patigayunon nga ELA sa Davao City sa maabot nga Oktubre 17-19, 2019.
Ginklaro sini nga optional lamang ang ila pag-upod sa Davao kag wala sang ideya kun sin-o sa mga kaupdanan nga board members ang magaupod.
Nagapati man ang opisyal nga mas makatipid ang gobyerno kun mag-imbitar na lamang sang mga resource person sa Capiz sa baylo nga magpadulong sa Davao City.
Apang ginklaro ni Hachuela nga ginarespeto sini ang gobernador kag indi mahimo nga pangunahan ang desisyon sang amay sang probinsiya, bangud posible may ginatan-aw nga maayo nga programa nga mahimo nga ma-apply sa Capiz ang executive department, kun didto sa Davao City patigayunon ang Strategic Planning seminar kag ELA.
