ROXAS CITY – Ginklaro ni Board Member Jonathan Sonny Besa nga wala nalakip sa gin-aprubahan nga Annual Investment Program ukon AIP ang pagbakal sang bag-o nga backhoe sang Provincial Engineer’s Office.
Sa interview sang Bombo Radyo kay Besa nga wala ini nalakip sa 20% development fund savings gikan sa tuig 2017 tubtob 2019.
Ginpahayag ni Besa nga kinahanglan nga i-program ini sang talatapan kag mangayo sang approval sa Provincial Development Council.
Suno kay Besa nga nagasunod lamang ang Sangguniang Panlalawigan sa proseso sa pagpain sang pondo sa mga kinahanglanon sa probinsya rason nga indi nila ini gilayon maaksyunan.
Bangud diri, kinahanglan sang talatapan ang approval ukon endorsement nga magahalin sa PDC agud nga maaprubahan ang gina-request nila nga P12 million sa pagbakal sang bag-o nga backhoe.
Gin-athag man ni Besa sa tion nga aprubado na ini sang PDC magaagi sa gihapon ini sa Sangguniang Panlalawigan agud pormal na maaprubahan ang nasambit nga request.
Mahibaluan nga naga-appeal karon ang talatapan kay Capiz Governor Esteban Evan Nonoy Contreras nga kuntani makabakal sang backhoe ang probinsya sang Capiz.
Ini matapos nga gin-disapproved sang Sangguniang Panlalawigan ang gina-request sang Engineer’s Office nga pagbakal sang bag-o nga backhoe para sa ginakaayo nga mga provincial roads.
