ROXAS CITY – Nag-angkon sang pilas sa ulo kag dughan ang isa ka drug surrenderee nga bodyguard sang alkalde sang banwa sang Panit-an, Capiz, matapos luthangon sang wala pa nakilala nga suspek sa Barangay Malapad Cogon, Sigma, Capiz.
Ginkilala ang biktima nga si Jonel Derramas 46-anyos sang Barangay Agluway, Panit-an nga nasapwan nga patay sang nagresponde nga mga barangay tanod nga nakabati sang tatlo ka asud asod nga lupok.
Sa interview sang Bombo Radyo kay Senior Inspector Efren Yueng, hepe sang Sigma Municipal Police Station, ginpahayag sini nga padayun ang ila nga imbestigasyon kag nagapangita man sila sang mga ebedensiya para matumod ang mga suspek kag motibo sa pagpatay sa biktima.
Wala man ginabalewala ni Yueng ang posibilidad nga may kahilabtanan sa droga ang krimen, bangud sa narekober nga droga sa biktima.
Narekober sang Scene of the Crime Operatives (SOCO) – Capiz sa ginluntaran sang krimen ang sling bag nga may unod nga isa ka pakete sang shabu, 2 magazine nga may 11 live ammo, 2 cellphone kag ID.
