ROXAS CITY – Ginpatpat sang Bombo Abogado sa programa nga Dura Lex Sed Lex ang kahulugan sang Republic Act 9262 ukon ang Anti-Violence Against Women and their Children (VAWC).
Sa interview sang Bombo Radyo kay Atty. Vincent Dela Torre Cerado, Bombo Abogado nagikan sa Integrated Bar of the Philippines – Capiz Chapter, iya ginpahayag nga ang VAWC ang gintukod sang gobyerno sang Pilipinas sang tuig 2004 agud nga masabat ang nagasaka nga kaso sang violence ukon pag-abuso batuk sa mga kababainhan kag kabataan.
Suno kay Atty. Cerado, nagalakip ang layi sang nagkalain-lain nga pag-abuso kaangay na lamang sang physical, sexual, psychological, ukon economic abuse.
Gin-athag man sini nga ang layi ang mahimo mangin pundasyon agud makahatag sang proteksyon kag remedyo para sa mga biktima sang pagpang-abuso.
Nahibaluan nga sa 2022 National Demographic and Health Survey (NDHS) nga ginpaguwa sang Philippine Statistics Authority (PSA) nagapakita nga halos 1 sa 5 ka mga kababainhan ang nakaeksperyensya sang emosyonal, pisikal, ukon sekswal nga pagpang-abuso sang ila partner.
Sang 2023, yara sa 8,055 ka mga kaso nga ginklasipikar sa idalom sang Republic Act No. 9262 ang ginreport sa Philippine National Police (PNP).
