Ginkasadya sang gobyerno lokal sang Malay, Aklan ang liwat nga pagkilala sa isla sang Boracay bilang World’s Leading Luxury Island Destination sa World Travel Awards Grand Final Gala Ceremony nga ginhiwat sang damlag lang sa Savoy Palace, Madeira, Portugal.
Ang maragtason nga pagkilala ang kasunod sa nauna sini nga kadalag-an bilang Asia’s Leading Luxury Island Destination sa Asia and Oceania Gala Ceremony sa City of Dreams, Maynila sang Setyembre 3, 2024.
Ginlutos sang Boracay ang mga kilala nga nominado kasubong sang Jersey, Mustique, St. Vincent and the Grenadines, kag The Bahamas nga ilabi pa nga nagpapag-on sa posisyon sini bilang nagapanguna nga destinasyon para sa mga luxury travelers sa bilog nga kalibutan.
Samtang, positibo gihapon ang LGU nga maabot ang target tourist arrival sini nga 2.1 milyon bag-o matapos ang tuig 2024.
Ini ang apisar nga nakabalhag ini sang manubo nga tourist arrival sa nakaligad nga mga binulan apang wala gihapon ang mga ini nadulaan sang paglaum nga maabot ang nasambit nga numero.
Suno kay Kathrine Licerio, tagpamaba sang Malay Tourism Office nga tubtob Nobyembre 28, nakabalhag ang ila talatapan sang kapin 1,870,069 tourist arrival nga kun sa diin, kinahanglan pa ang masobra sa 230,000 tourists agud mamarkahan ang target nga 2.1 milyon sa pagtakup sang tuig.
Agud maabot ang nasambit nga numero, kinahanglan ang yara sa pito ka libo ka mga turista ang magabisita sa lugar kada adlaw kag nagapati ang mga ini nga matabo ini subong nga bulan sang Disyembre nga tion sang paskwa.
