ROXAS CITY – Ginkakibot sang Barangay Council sang Brgy. Dumolog ang operasyon sang mga kapulisan sa iligal nga pagbulang sa ila barangay, kahapon nga adlaw.
Sa interview sang Bombo Radyo kay Brgy. Kgwd. Pacifico Artillero, ginpahayag sini nga wala sila sang ihibalo nga may ginkasa nga operasyon ang otoridad sa ila lugar.
Aminado ini nga nangin masako sila kahapon nga adlaw sa pagbantay sa mga baybayon kadungan sa kapistahan ni San Juan Bautista.
Maayo man suno diri nga nag-operar ang mga kapulisan kag nadakpan ang anum ka mga persona kalakip ang mga ebidensiya sa iligal nga aktibidad.
Nahibaluan nga antes paman ang pag-aresto sa nasambit nga mga persona, may nagalaong na sa ila barangay nga magapatigayon sang tupada, apang ginbalibaran ang mga ini sang mga opisyal bangud hugot ini nga ginabawalan sa layi.
Matandaan nga akto nga nadakpan sang mga otoridad sanday Noel Francisco, 61, Emark Delantar, 31, Marcelo Telles Jr., 40, Joseph Aleligay, 55, Antonio Gredes, 61, kag Marlon Dela Cruz, 65 nga nagapatigayon sang iligal nga pagbulang kag nakumpiskar ang anum ka mga pambulang nga manok, duha ka bulang’ kag kuwarta nga P1,353.
Sa karon, ginahikot sang mga himata sang nagkaladakpan ang inug-piyansa para sa temporaryo nga kahilwayan sang mga naaresto.
