ROXAS CITY – Wala madayon ang regular session sang Barangay Mongpong, sini nga syudad, sang tinalikdan nga Domingo, Pebrero 6, sini nga tuig.
Ini matapos nga nagpatunga ang pagbayluhanay sang mga makahang nga tinaga sa tunga ni Barangay Kagawad Onarato Adelantar kag Punong Barangay Ricky Donato.
Sa interview sang Bombo Radyo kay Brgy. Kgwd. Adelantar, ginpahayag sini nga ginkalain sang iya buot ang pagbuyayaw sa iya ni Kapitan Donato, rason nga wala sini mapunggan nga magbalos sang buyayaw nga gintunaan sang ila kinagamo.
Suno diri, nag-ugat ang indi nila pag-intindihanay sa ginpatigayon nga sesyon sang nag-suhestiyon si Kgwd. Garry Opaño nga kun mahimo magpapasar sila sang resolusyon nga mahatagan sang allowances ang mga Barangay Health Workers (BHWs), nagsabat man suno diri ang Punong Barangay nga puwede gid nila ina mahimo.
Apang, sa pagdugang ni Opaño nga dalasaon naman pati ang mga volunteer BHW’s bangud nagaupod man ang mga ini sa pagpangbakuna, kag ginpaboran man ni Adelantar ang amu nga suhestiyon, ginaalegar sang duha nga naglain ang tono sang panabat ni Kapitan Donato kag ginsiling nga nagapamulitika na ang mga kagawad.
Ginkalain pa sang buot ni Adelantar sang nagsiling ang Punong Barangay nga siya ang masunod bangud siya ang Amay sang ila barangay.
Bangud diri, ginaalegar ni Adelantar nga ginbuyayaw ini ni Kapitan Donato, nga iya man ginbalusan kag nagluntad na ang tensyon sa ila sesyon.
Ginklaro man sini nga wala sang paghinangkatay nga tapungulay.
Sang ulihi, nagdesisyon si Adelantar nga mag-una guwa sa amu nga session hall.
