ROXAS CITY – Natalana nga magahiwat sang pagsinapol ang pinuno sang Committee on Police, Fire and Peace and Order sang Sangguniang Panlungsod, kaupod ang Barangay Officials kag kapulisan, angut sa maka-alarma nga nagakahinabo nga krimen sa syudad.
Ini ang ginpahayag ni City Councilor Atty. Gary Potato, sang mainterview sang Bombo Radyo.
Suno diri, pagahinalaan ang maayo nga tikang agud mahagan-hagan ang krimen sa Roxas City.
Dugang pa ni Potato, dako ang mabulig sang Barangay Officials sa pagtapna sa madata nga insidente sang pagpangawat, pagpangholdap, pagpangluthang kag iban pa nga krimen, bangud indi ini masarangan sang mga kapulisan gid lamang.
Nanotisyahan man sini nga matapos ang pagluga sang restrictions tuga sang COVID-19 sa syudad, nagdamo man ang nagginuwa nga mga tawo sa ila puloy-an, kag bangud sini, ekspektaron nga magadamo man ang insidente.
Ginpahanumdom man sang Konsehal nga may naga-eksister nga curfew sa mga menor de edad sa syudad, gani tion naman suno diri nga istriktuhon ang pag-implementar agud malikaw nga maulamid ang mga pamatan-on sa mga krimen.
Patigayunon ang nasambit nga pagsinapol sa Biyernes nga adlaw, Hunyo 17.
