ROXAS CITY – Malipayon nga ginapakigbahin nanday Punong Barangay Jony Arciga sang Barangy Sibaguan kag Punong Barangay Rufino Dunton sang Barangay XI ang naangkon nga kadalag-an kag pasidungog bilang ‘Drug Cleared Baranggay’ sa syudad sang Roxas.
Ang amo nga pasidungog ang nagikan sa Philippine Drug Enforcement Agency (PDEA) Regional Office VI.
Sa nakuha nga impormasyon sang Bombo Radyo nagikan kanday PB Arciga kag PB Dunton, naagum sang mga ini ang amo nga pasidungog bangud sa mga aktibidades nga ginapatigayon sang mga ini nga nagatuyo sa pagtapna sang mga malain nga buluhaton, partikular sa ilegal nga droga nga ginasunod naman sang surenderee sa tagsa sini ka mga barangay.
Dugang pa sang mga ini, recreational activities, paghatag trabaho ang luyag nila nga ipatigayon kag ang pagpasangkad pagid sang mga programa nga gina implementar sang mga kapulisan angot sa paglikaw sa ilegal nga druga para mamentinar ang pagiging Drug Cleared Brgy. kag para indi na magbalik ang malain nga aktibidad sa ila nga lugar.
Padayon sa gihapon ang pag-monitor sang mga ini sa mga aktibidad nga nagakahinabo sa ila nga tagsa ka lugar.
Tuman man ang pagpasalamat sang mga ini sa tagsa sini ka mga pumuluyo sa nangin kooperasyon subong man sa mga surenderees nga mas ginpili nga magbag-o.
