Nagpabutyag sang kalipay ang isa ka koalisyon sa natabo nga pagbunggu-anay sang duha ka barko sang China sa Bajo de Masinloc subong nga adlaw.
Kon sa diin ang Co-convener sang Atin Ito coalition kag Akbayan president nga si Rafaela David daw nalipay pa gani sa nagluntad nga pagbungguanay.
Kasunod sang insidente, ginpahayag sini nga ‘DASURV’ ukon nagakabagay ini para sa mga barko sang China nga nagatinguha sa pag-angkon sang teritoryo sang pungsod.
Ginpahayag pa sini nga nagapakita lamang ini nga wala na sang lugar ang mga nagapang-harass sa kadagatan sang Pilipinas, gani suno sa iya makabig nga ‘karma’ ang natabo.
Dugang pa sini, ginkwestyon man ni Atin Ito coalition Co-Convenor Rafaela David ang lihok sang China nga nagtuga sang kahadlok para sa kabuhi bisan sang kaugalingon sini nga personnel.
Samtang kadungan sini, nagpabutyag ini sang pagdayaw kag pagsaludo sa mga personnel sang Philippine Coast Guard nga nagapakig-away para sa kinamatarong sang pungsod.
Samtang, ginlunsar sang Atin Ito coalition ang ila ‘West Philippine Sea Rap Challenge’ subong nga adlaw.
Tinutuyo sang ila kampanya nga mapasanyog ang ihibalo sang publiko angot sa karon nga sitwasyon sang mga Pinoy sa West Philippine Sea.
Lakip sa mga nagtambong kag nagsuporta sa nasambit nga adbokasiya amo ang Filipino singer-songwriter nga si Noel Cabangon.
Ginsiling sini nga pinaagi sini, malab-ot man ang mga pamatan-on nga magbuylog sa aksyon sang koalisyon sa pagtib-ong sang kinamatarung sa teritoryo sang pungsod.
