Nagapanawagan ang Cambodia sang gilayon kag wala sang kondisyon nga ceasefire sa Thailand matapos nga nagluntad ang inaway sa tunga sang duha ka pungsod sang Huwebes, Hulyo 24.
Ini ang ginpalab-ot sang embahador sang Cambodia nga si Chhea Keo kasunod sang emerhensya nga pagsinapol sang United Nation Security Council sa New York sang Biernes, nga gintambungan sang mga tiglawas sang Cambodia kag Thailand.
Magluwas diri, ginpahayag man sang envoy nga naga-apelar ang Cambodia para sa matawhay nga solusyon sa konflikto sa tunga nila kag sang Thailand.
Nagpanwagan ang konseho sa magtimbang nga bahin nga magpakita sang pinakadaku nga pagpugong kag resolbahon ang pagbinaisay paagi sa diplomatiko nga paagi.
Sa subong, ang inaway nagresulta sa pagbakwit sang masobra 138,000 ka mga tawo gikan sa mga border regions sang Thailand kag nakapatay na sang 15 ka mga tawo, suno sa health ministry sang pungsod, sa diin 14 diri ang mga sibilyan kag isa ka soldado, samtang 46 ka mga tawo ang napilasan, lakip ang 15 ka mga soldado.
Ini ang nagmarka sang paggrabe sang madugay na nga pagbinaisay sa tunga sang duha ka kaingod nga pungsod, nga may 800-kilometers nga borders.
Ang madugay na nga pagbinaisay sa border dispute sa tunga sang Cambodia kag Thailand naghalin sa isa ka mapa sang 1907 nga ginhimo sa tion sang kolonyal nga panahon sang Pransia, nga gingamit sa pagseparar sang Cambodia kag Thailand.
Gingamit sang Cambodia ang mapa bilang basehan sa pag-angkon sang ila teritoryo, nga wala ginakilala sang Thailand kag ginakabig nga indi husto ang mapa.
