ROXAS CITY, CAPIZ- Ginapadasig na sang Capiz Electric Cooperative Inc. ang pagbalik sang supply sang kuryente sa mga lugar nga sa gihapon brownout pa bangud sang pag-igo sang Bagyo Tino sa probinsya.
Sa interview sang Bombo Radyo kay Engr. Edgar Diaz, General Manager sang Capiz Electric Cooperative Inc., iya ginpahayag nga as of 12:00 noon subong nga adlaw sang Myerkules, Nobyembre 5, 2025, may yara nalang sa 95 ka mga barangay sa probinsya ang wala pa sang kuryente.
Suno kay Diaz, ginatinguhaan na sa subong sang tagsa ka team sa tagsa man ka mga area nga mabalik na ang 100 porsyento nga supply sang kuryente sa probinsya.
Pahayag nya, may yara sang iban ka mga lugar ang kaangay nga mabudlay nga sudlon, apang pagahimuon gid sang ila nga talatapan nga makay-o ang nagkalaguba nga linya.
Nahibaluan nga bangud sang Bagyo Tino, may yara sang 10 tanan ka mga poste ang natumba apang ini ang human sa kahoy.
Nagapanawagan naman ang natungdan sa mga konsumidor nga kuntani palawigon pagid ang tagsa nila ka mga pasensya, bangud nga ginahimo naman sang ila nga talatapan ang tanan para dalayon na nga mabalik ang supply sang kuryente sa probinsya.
Interviewed by Bombo Francis Biñas
