ROXAS CITY – Ginklaro sang tagdumalahan sang Capiz Electric Cooperative (CAPELCO) nga wala sila makahibalo nga nautod ang kable sang kuryente sa Barangay Daan Sur, Tapaz, Capiz.
Sa exclusive interview sang Bombo Radyo kay Engineer Edgar Diaz, ginpahayag sini nga sandig sa logbook sang Dumalag area office, nakarekord nga Pebrero 26 sang nagpalab-ot sang reklamo ang mga residente nga ‘brown out’ sa ila barangay, apang gilayon man nga mabalik ang kuryente.
Marso 1, pasado alas-4 sang hapon, sang nagalakat ang 7 katuig nga lalaki, posible suno diri nga nadanlog ang bata kag dumiretso sa nautod nga kable sang kuryente.
Dugang pa sini, nga Marso 1, alas-6:36 sa gab-i, diri palang sila ginpahibalo nga may nautod nga kable sang kuryente sa amu nga lugar kag may napatay.
Nadesisyunan sang CAPELCO nga gilayon i-deploy ang mga crew sa Tapaz apang bangud tuman kabudlay sang dalan pasulod sa amu nga barangay, ginpakamaayo nga i-shutdown ang bug-os nga Daan Sur, agud indi na madugangan ang makuryente.
Pagka-aga, Marso 2, ginsiling ni Diaz nga nagpadulong sa amu nga opisina sa Dumalag ang lolo sang biktima kaupod si Barangay Kapitan Alex Gicalao, kag gin-aku nga naling-an nila nga i-report gilayon nga may nautod nga kable sang kuryente malapit sa ila balay, bangud sige man ang suplay sang kuryente sa ila, kag nagahinyo nalang nga kun mahimo mabuligan sila pinansyal.
Suno kay Diaz, ang immediate nga nahatag sang iya opisina ang P10,000, kag igaduso pa sini sa board of directors nga mahatagan sang dugang nga assistance ang pamilya sang biktima.
Gin-athag sang general manager nga wala ginabasol sang pamilya ang CAPELCO.
Panawagan ni Diaz sa mga konsumidor nga kun may mga problema sa kuryente sa ila lugar, gilayon nga ipahibalo sa ila opisina agud ma-aksyunan.
Ginmanduan niya suno diri ang mga tinawo sang CAPELCO nga kun may magparecord sa ila logbook, gilayon ini nga padulongan.
Sa mga konsumidor, mensahe ni Diaz nga kuhaon ang pangalan sang staff sang CAPELCO nga inyo ginpabalhagan sang reklamo, agud mapanabat kun indi maaksyunan.
