ROXAS CITY – Ginkompirmar ni Capiz 1st District Congressman Emmanuel ‘Tawi’ Billones Sr., nga pormal nga magapungko bilang panibag-o nga House Speaker sang KAMARA si Marinduque Representative Lord Allan Velasco sa Oktubre 14 tal-us sa House Speaker Alan Peter Cayetano.
Sa interview sang Bombo Radyo kay Billones nga nagpatigayon sang sinapol sa Malakanyang kun sa diin kalakip diri ang mga kongresista.
Ginpahayag ni Billones nga may yara sang ginpirmahan nga manifesto of support para kay Cayetano ang mga kongresista kun sa diin naglab-ot sa masobra 200.
Matandaan nga base sa term sharing agreement nga ginkasugtanan nanday Presidente Rodrigo Duterte kag Cayetano nga hatagan ini sang 15 ka bulan agud magpungko bilang House Speaker sang KAMARA kag pagatal-usan ini ni Velasco para sa nabilin nga 21 ka bulan sang 18th Congress.
Ginahinalaan man subong sang mga kongresista ang pagpungko ni Velasco kun sa diin may yara man sang nagasuporta sa iya sa oras nga magpungko ini bilang House Speaker.
Dugang pa ni Billones nga luyag lamang pamatud-an ni Velasco nga masarangan man sini ang trabaho bilang House Speaker kun sa diin handa sini nga pamatud-an ang iya nga abilidad para sa nasambit nga posisyon.
Samtang, nagresign naman sa puwesto si Speaker Alan Peter Cayetano kasunod sang anunsiyo nga dayon na ang term-sharing nila ni Representative Lord Allan Velasco.
Apang ang nasambit nga desisyon ang ginpamatukan naman sang plenaryo.
Nahibaluan nga sang damlag lang, nagtambong sa pagsinapol nga ginpatigayon sa Malacañang sa diin nag-atubangay sanday Velasco kag Cayetano kay Presidente Rodrigo Duterte.
