MAAYON, CAPIZ- Nagpa-athag ang Capiz Electric Cooperative (CAPELCO) nahanungod sa ginaalegar pagpangholdap sa isa ka Barangay Power Association (BAPA) Officer sa Barangay Batabat, Maayon, Capiz.
Ang biktima amo si alyas ‘Maricel’, 49 anyos kag residente sang Barangay East Villaflores sa amo man nga banwa.
Sa interview sang Bombo Radyo kay Engineer Edgar Diaz, General Manager sang Capiz Electric Cooperative (CAPELCO), iya ginpahayag nga base sa internal auditor sang ila talatapan, wala pa man matabo ang pagpang-holdap, may yara na sang dako nga kulang sa kwarta nga nakolekta.
Suno kay Engr. Diaz, nag-issue ang ila talatapan sang 48-hour notice sa nasambit nga Barangay Power Association (BAPA) Officer agud nga i-settle ang kulang nga kwarta sa iya nga ginsuktan apang ini ang nag-report nga ginaalegar ginhold-up sang mga wala pa makilan-an nga mga persona.
Pahayag pa niya, padayon ang imbestigasyon kun bala may kamatuuran ang amo nga insidente ukon may posibilidad sang pagdispalko sang kwarta.
Dugang pa sang natungdan, ang mangin isa ka Barangay Power Association (BAPA) Officer ang may kalakip nga risgo nga klase sang trabaho rason nga kinahanglan gid sang hangtup nga paghalong.
Interviewed by Bombo Francis Biñas
