ROXAS CITY – Ginkompirmar ni Capiz Governor Esteban Evan Contreras nga gin-aprubahan na sang Sangguniang Panlalawigan sa ginpatigayon nga sesyon sang provincial board ang isa ka resolusyon agud mabuligan ang mga scholars sang gobyerno-probinsiyal humalin sang tuig 2016 tubtob 2019.
Ini ang ginpahayag ni Contreras sang ma-interview sang Bombo Radyo.
Suno kay Contreras nga nagapasalamat ini sa provincial board matapos nga matigayon nga masolusyonan ang problema nga ginbilin sang del Rosario administration.
Ang mga scholars nga yara sa pribado nga eskwelahan gikan sang tuig 2016 ang makabaton sa gihapon sang bulig-pinansiyal nga P5, 000 per semester sa baylo nga 85% ang ila nga general average kag wala sila sang failing grade samtang may yara naman sang P1, 000 per semester nga financial assistance ang mga yara sa public schools.
Para naman sa mga scholars sang gobyerno-probinsiyal humalin sang school year 2019 sa pribado nga eskwelahan, makabaton man sila sang P5, 000 per semester kag ang ka mga scholars sa pampubliko nga eskwelahan ang makabaton man sang P1, 000 per semester nga financial assistance sa baylo nga 85% ang ila nga general average kag wala man sila sang failing grade.
Suno kay Contreras nga gintinguhaan gid sang gobyerno-probinsyal kag provincial board nga makadihon sang solusyon agud indi masikway kag mapabay-an ang mga kabataan nga nagasalig sang ila pag-eskwela sa bulig sang gobyerno-probinsiyal.
Ang nasambit nga mga scholars ang gin-require man nga magkuha sang qualifying examination sandig sa bag-o nga scholarship ordinance sang gobyerno-probinsiyal.
Sa karon nagapadayon ang ginadihon nga ordinansa nga nagaduso sang institutionalized scholarship program sang gobyerno-probinsiyal ang mangin epektibo pa lamang sa school year 2020.
Suno kay Contreras nga indi sakop sang amo nga ordinansa ang mga ‘existing’ scholars bangud kinahanglan nila nga magkuha liwat sang qualifying examination para sa bag-o nga scholarship ordinance.
