ROXAS CITY – Nagpadala sang veto message si Capiz Gov. Esteban Evan Nonoy Contreras sa Sangguniang Panlalawigan may kaangtanan sa pag re-alligned sang pondo kag pila ka mga probisyon sa ginpapasar nga Appropriation Ordinance sa pila ka mga proyekto kag programa sa probinsya.
Sa interview sang Bombo Radyo kay Contreras ginpahayag sini nga wala sang kinamatarong nga magkuha sang pondo ang legislative department sa mga ginproponer nga mga programa ukon proyekto sang probinsya.
Ini may kaangtanan sa pagkuha sang P1 million nga para sa Computerization Program sang CAPENRO. Ini bangud luyag sang Sangguniang Panlalawiga nga idugang ang nasambit nga pondo para kuntani sa pagbakal sang COVID-19 vaccinesApang suno kay Contreras may yara man sang ginpain nga pondo nga P20 million pesos para sa COVID-19 Response lakip na ang pagbakal sang vaccines.
Ginpahayag sang gobernador nga ang executive department lang dapat may kinamatarong kun sa diin ibutang ang nasambit nga pondo sang gobyerno probinsyal.
Nagpahanumdom naman si Contreras nga ginahimo man sini ang iya obligasyon bilang gobernador para sa mga pumuluyo sang probinsya.
