ROXAS CITY – Nagapabor ang gobernador sang probinsiya nga himuon nga tatlo ka mga distrito ang probinsiya sang Capiz.
Ini ang ginpahayag ni Capiz Governor Antonio Del Rosario kasunod sang pagpaguha sang Philippine Statistics Authority (PSA) sang August 2015 Census of Population sa probinsiya.
Suno sa gobernador, nagapabor ini nga madugangan sang isa ka legislative district ang probinsiya apang suno sa iya nga malawig pa ini nga proseso kag indi ini dapat pagdali-dalion.
Ginpahayag pa sini nga daku nga bentaha para sa probinsiya ang pagdugang sang isa pagid ka distrito bangud isa ini ka daku nga pamaagi agud mapa-umwad pa ang pila ka mga kabanwahanan sa probinsiya.
Gindugang pa sini nga kinahanglan pamatian man ang bahin sang publiko angut sa pagdugang sang isa ka distrito sa probinsiya.
Suno pa kay Del Rosario nga indi naman ini bag-o sa iya bangud madugay na ini nga plano apang wala madayon bangud madamo sang kinahanglan i-konsiderar sa pagdugang sang isa ka distrito sa isa ka probinsiya.
Mahibaluan nga sandig sa datos sang PSA , nagalab-ot sa 761, 384 ang populasyon sang probinsiya sang Capiz.
Mahibaluan nga sandig sa 1987 Philippine Constitution, tagsa ka 250,000 nga populasyon ang nagakadapat nga may tiglawas ukon congressman sa House of Representatives kag mahimo naman ini nga makabug-os sang isa ka legislative district ukon distrito.
Sa karon, ginabug-usan sang duha ka distrito ang probinsiya sang Capiz sa diin ang premier distrito ang may yara sang anom ka mga banwa kag isa ka siyudad samtang may siyam naman ka mga banwa ang segundo distrito.
