ROXAS CITY – Dako ang pagpasalamat sang Capiz Medical Society kay Capiz 1st District Congressman Emmanuel ‘Tawi’ Billones Sr. bangud sa pag-apelar sa Department of Health (DOH) Regional Office 6 natuhoy sa dugang nga augmentation sang medical workers sa probinsiya.
Ini ang ginpahayag sang bise-presidente sang nasambit nga organisasyon nga si Dr. Victor Federico Acepcion sang mainterview sang Bombo Radyo.
Suno kay Acepcion nga ginakalipay nila ang gilayon nga pagpakig-angut ni Billones sa DOH-6 kag nagapanawagan sila sa suporta sang iban pa nga mga public officials.
Suno diri, indi man nila luyag magtuga sang alarma sa publiko apang yara na gid sa karon sa kritikal nga kondisyon ang healthcare system sa probinsiya.
Sa pihak suno diri nga may yara pa sang pipila ka bakante nga hospital beds sa Roxas Memorial Provincial Hospital, ang designated provincial COVID-19 facility, ‘underman’ ukon kulang na sa tawo ang amo nga ospital.
Ini bangud sa pag-positibo sa coronavirus disease (COVID-19) sang pila ka doktor, nurses kag nursing attendants.
Magluwas diri suno sa iya, madamo na ang nag-resign kag madamo pa ang nagpabutyag nga maga-resign kag maga-schedule sang leave.
Matandaan nga una na nag-apelar ang grupo sang mga doktor sa probinsiya sang 14-day moratorium ukon temporaryo nga pagpaiway sa pagpapauli sa mga Locally-Stranded Individuals (LSI’s) kag Returning Overseas Filipinos (ROF’s) bangud sa kondisyon sang healthcare system sa probinsiya.
Una na nga ginpahayag ni Acepcion, base sa ila nga datos, 61.4 porsyento sang mga coronavirus disease (COVID-19) cases sa probinsiya ang mga LSI’s kag ROF’s.
Dako ini nga porsyento sa populasyon suno sa iya kag dako nga risgo nga maglapta ang virus.
