CAPIZ – Naghimo sang kasaysayan ang probinsya sang Capiz pinaagi sa paglunsyar sang labing una nga provincial program sa Pilipinas para sa mga pasyente nga may X-linked Dystonia Parkinsonism ukon XDP.
Sa interview sang Bombo Radyo kay Provincial Health Officer II Dr. Ramon Alex Nolasco, iya ginpahayag nga katuyuan sang programa amo nga mahatagaan sang comprehensive care, support kag management ang mga indibidwal kag pamilya nga apektado sang nasambit nga balatian nga isa ka tumalagsahon nga genetic movement disorder nga nagaapekto sa mga lalaki.
Ang Provincial Office ang nanguna sa paglunsyar sang programa sa idalom sang pagpamuno ni Capiz Governor Fredenil Castro kaupod ang Roxas Memorial Provincial Hospital.
Ginpabutyag man ni Governor Castro ang mabaskog nga commitment sang provincial government sa pag-improve sang public health kag pagkabig sang amo nga inisyatibo bilang “milestone of hope” indi lang sa Capiz kundi mangin sa bilog nga pungsod.
Nahibaluan nga ang X-linked Dystonia Parkinsonism ang malawig na nga ginakilala bilang pagpanghangkat sa ikaayong lawas sa isla sang Panay partikular na sa Capiz sa diin may yara na sang ginabanta 200 ka mga kaso nga narekord nga may nasambit nga balatian.
