ROXAS CITY, CAPIZ – Gindihon sang Gobyerno Probinsyal ang pagliwat sa 2017 Smoke-Free Ordinance pinaagi sa ginaduso nga Comprehensive Smoke-Free and Vape-Free Ordinance bilang tikang para sa mas malimpyo nga probinsya.
Ini nga hagna ang ginsumiter kahapon nga adlaw, Hunyo 2, 2025, sa pagpanguna ni Board Member Thea Faith Reyes, bilang Chairman sang Committee on Health, sa idalum sang pagdumala ni Governor Fredenil H. Castro.
Ang amo nga bag-o nga bersyon sang ordinansa ang mas ginpasangkad ang mga probisyon agud mas maprotektahan ang ikaayong-lawas sang pumuluyo kag ang palibot pina-agi sa mas istrikto nga regulasyon batok sa pagpanigarilyo kag vaping.
Ginadumilian ang paggamit sang sigarilyo, vape, kag heated tobacco products sa halos tanan nga pampubliko nga lugar, establisyemento, kag mga pangpubliko nga transportasyon.
Lakip sa bag-o nga ordinansa ang mga lugar nga ginatugutan, apang may hugot nga pagsulundan.
Ginaprotektahan man sini ang kabataan paagi sa pagbawal sang pagbaligya ukon pag-promote sang mga produkto sa mga indibidwal nga wala pa 21-anyos, kag sa mga online platforms.
Pabor ini sa publiko kay ginapangamligan sini ang tanan, ilabi na ang kabataan, mga babayi nga nagabusong, kag mga may balatian batok sa epekto sang secondhand smoke kag vape.
Ginasiguro man sang ordinansa ang limpyo, kag mas matawhay nga palibot para sa tanan nga Capisnon.
Ang mga multa sa paglapas ukon bayolar sa mga pagsulundan, pagatipunon sa Tobacco Control Fund nga gamiton sa mga Health Education programs kag suporta sa mga luyag mag-untat sa pagpanigarilyo.
Dugang pa diri, magatukod sang Task Force nga mangin responsable sa istrikto nga pagpatuman sang ordinansa sa bug-os nga probinsya.
via CAPIZ PROVINCIAL GOVERNMENT COMMUNICATIONS GROUP
