ROXAS CITY, CAPIZ- Nasyonalismo ang nagalabaw nga balatyagon sang mga Capisnon sa pagsaulog sang ika-127 nga tuig sang Adlaw sang Kahilwayan ukon Independence Day, Hunyo 12, 2025.
Sa nangin pahayag ni Attorney Stephen Alquiza, Local Youth Development Officer sang Capiz, iya ginsiling nga ang pagtililipon nga ginhiwat sa Capiz Provincial Government ground, Roxas City agud i-komemorar ang adlaw sang kahilwayan ang mismo simbolo sang pagiging hilway.
Dugang pa sini, nga ang Independence Day isa ka tion agud dumdumon kag hatagan sang pagpasidungog ang mga baganihan kag mga pumuluyo sang pungsod sa giinpakita nga kaisog kag paghiliusa agud makuha ang kahilwayan sa mga espanyol.
Ginsaysay man ni Atty. Alquiza, ang pila ka mga nagkahinabo sang adlaw sang opisyal nga pagwagaywag sang hayahay sang Pilipinas nga natabo sang Hunyo 12, 1898 sa Kawit, Cavite.
Nahibaluan nga ang nasambit nga kahiwatan nga ginpatigayon sa syudad sang Roxas ang ginkalikapan sang nanari-sari nga mga aktibidad sa diin gin-umpisahan ini sang 21-Gun Salute, paghalad sang bulak kag gintapos pamaagi sa pagpalupad sang mga kalapati nga simbolo sang kahilwayan, katawhay, kag paglaum.
Gintambongan man ini sang mga nagkalain-lain nga ahensya sang gobyerno, mga edukasyonal nga institusyon, Knights of Columbus, Makawiwili Masonic Lodge No. 55, Boys Scout and Girls Scout of the Philippines, kag iban pa nga mga organisasyon.
Samtang, ang bug-os nga aktibidad nagapakita sang padayon nga pagpasidungog sang mga Capisnon sa mga prinsipyo sang kaginhawaan, nasyonalismo, kag pagkahiusa — nga amo ang gintindugan sang mga bayani sang 1898 kag padayon nga ginakabig sang mga pumuluyo sang Capiz tubtob subong.
