ROXAS CITY – Nagapati si Capiz Provincial Administrator Edwin Chinel Monares nga may bahid sang pamulitika ang pagpaiway sang mga Board Members sang Sangguniang Panlalawigan nga magbakal sang 30 ka mga units sang rescue vehicle nga nagabalor sang P24 milyones.
Suno kay Monares nga ang budget sa pagbakal sang nasambit nga mga rescue vehicles ang nalakip sa Annual Investment Program 2020 sang probinsya.
Mahimo nga magamit ang pondo para sa pagbakal sini apisar nga wala pa maaprubahan.
Ginarespeto man sini ang resolusyon nga ginpapasar sang provincial board members nga nagapamatok sa pagbakal sini apang nagadepende kay Capiz Governor Esteban Evan “Nonoy” Contreras kun pagasundon ang ginahinyo sang mga Board Members.
Ginpahayag pa ni Monares nga bangud nalakip sa gin-aprubahan nga Annual Budget ang pagbakal sang mga rescue vehicles, nagakadapat nga baklon ini kag mahimo nga mapasakaan sang kaso administratibo si Contreras kun mapaslaw ini nga makabakal.
Dugang pa sini nga ginadalian ang pagbakal sang mga rescue vehicles ilabi na nga ginakulang ang probinsya bangud sa pagtransport sang mga nagapauli nga mga Locally Stranded Individuals (LSI’s) sa magkatuhay nga mga Quarantine Facilities.
Mahibaluan nga ang Office of the Ombudsman lamang makadesisyon kun may nalapas si Contreras kag indi ang Sangguniang Panlalawigan.
