Liwat na naman nga ginhatagan sang kadungganan sang Capiznon nga si Angel Villagracia ang bilog nga probinsya sang Capiz matapos nga makuha sang Philippine Girls’ 4×100-meter relay team ang silver medal kag nagguba pa ang Philippine Junior Record sa ASEAN School Games sa Bandar Seri Begawan, Brunei Darussalam.
Ang team nga ginalakipan ni Angel Villagracia sang Capiz ang nagtapos sang relay sa 47.16 second, nagapangaduha sa Thailand nga may 46.38-second run.
Una na nga nag-record sang mas madasig nga oras ang team Pilipinas sa 47.15 seconds nga opisyal nga nagguba sang daan nga junior record nga 48.06 set sang 2018.
Madamo pa gid ang nagbilib sa team bangud sa edad sang mga atleta sa diin tatlo ka mga runners ang nabun-ag sang 2008 kag isa naman ang nabun-ag sang 2011.
Sa pihak sang lamharon nga edad, ginapamatud-an sang mga atleta sang Pilipinas nga makasarang ang mga ini nga mag-compete kaupod sa iban nga pungsod sa Southeast Asia.
Nahibaluan nga magluwas kay Villagracia, ginabug-osan nanday Francene Rosario, Lhynette Libranda kag Rose Jane Barcelona ang record-breaking Republic of the Philippines School Team 2025.
Sa sini nga kadalag-an, ginpakita sang mga young sprinters nga masanag ang buwas-damlag sang Philippine athletics.
