CAPIZ – Nangin inspirasyon sang Capiznon nga ginkoronahan bilang Mr. Tourism Global International 2026 ang iya sini nagtaliwan nga iloy.
Sa interview sang Bombo Radyo kay Israel Jay Bornales, iya ginpahayag nga highschool pa lang sang nagsulod ini sa pageantry tubtob nga nahatagan sang kahigayunan nga mag-intra sa international pageant.
Suno kay Bornales, malip-ot nga tion lang ang nangin preparasyon sini sa kompetisyon apang natigayon man nga makuha ang korona kag gindeklara pa nga King International 2026.
Pahayag pa niya, numero uno nga advocacy sini amo ang animal welfare kun sa diin ginahatagan gid sang importansya ang pag-atipan kag pagsiguro sang seguridad sang mga kasapatan.
Nagapasalamat man ang natungdan sa iya pamilya, mga abyan, kag supporters nga padayon nga naga-upod kag nagasalig sa iya.
