Magapatigayon sang turn-over ceremony ang Capiz State University-Pontevedra Campus- Livestock Research and Development Center sang mga buffaloes ukon karabaw para sa pila ka mga mangunguma sa Barangay Binuntucan, Pontevedra Capiz.
Sa interview sang Bombo Radyo kay Dr. Emely Escala, Director sang Livestock Research and Development Center sang CAPSU, iya ginpahayag nga ang ini nga aktibidad ang kabahin sang Economic and livelihood program sa idalum sang ”Enrichment through Science, Technology & Innovation”.
Suno kay Dr. Escala, ini ang may katuyuan nga mabuligan ang mga mangunguma nga madugangan ang pangabuy-anan kag mas mapasangkad ang dairy industry sa probinsya.
Pahayag pa niya, kaupod sa sini nga aktibidad ang Department of Science and Technology (DOST) kag Philippine Carabao Center.
Kadungan sini, ang mga katapo sang Livestock Research and Development Center magapatigayon man sang training sa mga mangunguma agud madugangan ang ila ihibalo sa husto nga pag-atipan kag paggatas sang mga buffaloes kag kun ano nga mga produkto ang sarang maubra gamit ang gatas.
Dugang pa sang natungdan, lauman nga magapadayon ang pagbulig sa mga mangunguma pamaagi sa nagkalain-lain nga aktibidad sang talatapan.
