ROXAS CITY, CAPIZ – Akig kag dismayado ang cause-oriented groups nga wala ginpapag-on sang Senado ang legislated bill nga P200 nga dugang nga sweldo sa mga minimum wage workers sa pribado nga sector.
Sang damlag lang, ginpakamalaot ni House of Representatives Spokesperson Princess Abante ang Senado bangud daw kaangay nga ginpatay sini ang ginaduso nga wage hike pinaagi sa pagpamalibad nga mag-convene ang bicameral conference committee sa katapusan nga gab-i sang session sang 19th Congress.
Sa interview sang Bombo Radyo kay Mr. Elmer Forro, Secretary General sang Bayan Panay, iya ginpahayag nga sa ginhimo sang senado, nagapakita lamang nga wala ang mga ini nagakabalaka nga solbaron ang kapigaduhon sa pungsod.
Suno kay Forro, naglaum ang labor groups nga mahatagan na kuntani sang atensyon ang ginasinggitan sang mga mamumugon kag mga pumuluyo apang nagguwa nga indi prayoridad sang mga senador ang mga Filipino workers.
Dugang pa sang natungdan, daku ang epekto sa mga pumuluyo ang ginhimo sang senado bangud madamo sang nagakabuhi sa below poverty line kag indi makalagas sa pagtaas sang mga balaklon.
Sa pihak sini, positibo sa gihapon si Forro nga mahatagan sang pagtamod sa 20th Congress ang ila ginaduso nga dugang nga sweldo para sa mga mamumugon.
– Interviewed by Bombo Lynd-C Bade
