Nagpanawagan si Suspended Cavite 4th district Representative Kiko Barzaga sang imbestigasyon angut sa kamatayon ni Dueñas, Iloilo Vice Mayor Aimee Paz Lamasan agud mahibaluan kon bala ang iya kamatayon bangud sa iya ihibalo sa mga maanomaliya sa flood control projects sa probinsya sang Iloilo.
Sa video nga gin-upload ni Barzaga online, ginpahayag sini nga “makaduluda” ang timing kag nature sang kamatayon sang Vice Mayor.
Ginbuyagyag ni Barzaga nga madamo sang mga pamangkot ang nagtuhaw gikan sa insidente.
Dugang pa niya, “Ang probinsya sang Iloilo ginapuy-an sang madamo nga mga prominente nga personalidad sa flood control corruption scandal kaangay ni House Senior Deputy Majority Leader kag Iloilo Third District Rep. Lorenz Defensor kag House Deputy Speaker kag Iloilo 1st District Representative Janette Garin upod ang iya anak nga babayi nga si Board Member Rica Jane Garin.”
Tubtob subong, wala pa sang ginpagwa nga pahayag ang kampo sang nasambit nga mga mamalidha kag mga lokal nga opisyal sa mga alegasyon ni Barzaga.
Matandaan nga nagtaliwan ang Bise Alkalde sadtong bisperas sang bag-ong tuig, Disyembre 31, matapos ginaalegar aksidente nga ginluthang ang iya kaugalingon sa sulod sang ila balay sa isa ka subdivision sa La Paz, Iloilo City.
