ROXAS CITY – Aminado si City Disaster Risk Reduction and Management Office (CDRRMO) head Dennis Saneo nga kakulangan lamang sa pag-impormar sa mga kabaranggayan ang ila problema angut sa pagpalubong sa mga COVID-19 suspected kag confirmed cases.
Suno kay Saneo nga nagasunod sa gihapon ang mga katapo sang CDRRMO sa mga health protocols kag proper handling sa paglubong sa mga COVID-19 patients.
Nagpaathag naman ini natuhoy sa natabo sa Barangay Banica kun sa diin nag-angkon sa komosyon sa tunga sang mga barangay officials kag katapo sang CERT sa paglubong sa isa ka COVID-19 Suspected.
Apang, gilayon man sila nakabaton sang tawag nagikan kay Punong Barangay Victor Dolor natuhoy sa natabo.
Ginpahayag ni Saneo nga nagasuksok ang mga ini sang Personal Protective Equipment’s ukon PPE’s sa paglubong sa biktima kag posible nga wala lamang nakita sang mga opisyales sang barangay.
Mahibaluan nga ginauba na ang PPE’s kun ma-exposed sa mga COVID-19 suspected kag confirmed cases agud nga malikawan ang pagtinir sang virus sa mga ginasuksok sang mga frontliners.
Dugang pa sini nga luwas ang paglubong sa mga COVID-19 suspected ukon confirmed cases bangud ginasiguro gid nga naka-sealed ang lulubngan ukon pantyon sang ila nga casualty.
Samtang, naglab-ot naman sa 18 ang cremated, 15 ang confirmed cases sa COVID-19 sa diin naglab-ot sa kabug-usan nga numero nga 33 kalakip na diri ang 20 ka mga COVID-19 casualty.
Nagpasalig naman si Saneo nga ginasunod gid sang CDRRMO ang mga ginapatuman nga guidelines kag protocols sang Department of Health sa paglubong sa mga COVID-19 probable, suspected kag confirmed cases.
