Ginkumpirmar ni US President Donald Trump nga madayon na ang negosasyon para sa ceasefire deal sa tunga sang Ukraine kag Russia, kasunod sang pagpakighinala sini kay Russian President Vladimir Putin.
‘Ang Russia kag Ukraine ang insigida nga maghinala may kaangtanan sa Ceasefire kag labi sa tanan, ang pag-untat sang giyera,’ pahayag ni Trump.
Suno kay Trump, may pila na nga progreso kaangut sa kalinong, kag gin-abisuhan na niya ang mga lider sang Ukraine, European Union, France, Germany, Italy, kag Finland.
Subong man, suno sa Kremlin, madugay pa ang proseso kag wala pa sang konkreto nga petsa sang untat-putkanay.
Nagpamalibad man si Trump sa pagpamatbat sang bag-o nga silot sa Russia, bangud posible nga maglala ang tensyon.
‘Bangud sa dahom ko nga may yara sang chansa agud tapuson ang isa ka butang ukon sitwasyon, kag kun himuon mo ina, kaangay ginpalala mo pa. Apang may ara sang tama nga tyempo para matabo ina,’ dugang ni Trump matapos ginpamangkot sang media kun ngaman indi sini pagsilotan ang Russia.
Sa pihak nga bahin, gindayaw man ni Putin ang panawagan ni Trump para sa direkta nga pagpakig-hinala, samtang si Ukrainian President Volodymyr Zelenskiy ang nagpahayag nga preparado ini nga makig-istorya sa Russia sa anuman nga format nga magadala sang resulta sa rehiyon.
‘Preparado ang Ukraine para sa direkta nga negosasyon sa Russia sa anuman nga sahi sang format nga magadala sang resulta,’ pahayag ni Zelenskiy sa iya sini nga social media.
Samtang, pila sa mga posible nga lugar nga patigayunan sang paghinalaay may kaangtanan sa ceasefire deal amu ang Vatican, Turkey, kag Switzerland.
