Nagpahayag sang kahandaan ang China nga magbulig sa Russia agud nga masolusyunan ang mga epekto sang tensyon sa Middle East, partikular ang sitwasyon sa Strait of Hormuz.
Sa isa ka pag-istoryahanay sa telepono kay Russian Foreign Minister Sergei Lavrov, ginsiling ni Chinese Foreign Minister Wang Yi nga padayon nila nga ginasuportahan ang mga tikang sang United Nations Security Council (UNSC) para sa kalinong.
Ginsambit ni Wang nga ang pinaka-importante nga tikang agud mauntat ang krisis amo ang gilayon nga ceasefire kag ang pagduso sang political settlement pamaagi sang dialogue kag negosasyon.
Ang amo nga pag-istoryahanay sang duha ka mga opisyal natabo antes ang natalana nga botohan sa UNSC natuhoy sa resolusyon sang Bahrain nga nagatuyo nga proteksyunan ang komersyal nga pagpadala sa Strait of Hormuz.
Suno sa pahayag sang Russian Foreign Ministry, maayos ang relasyon sang China kag Russia sa ila nga panan-awan sa mga nagapanguna nga global issues, kalakip na ang sitwasyon sa Iran, nga ginaangut nila sa agresyon sang Estados Unidos kag Israel.
Sa kabug-usan, lunsay nga nagpanindugan ang duha ka mga pungsod sa pagkinahanglan sang madasig nga ceasefire kag political-diplomatic nga pag-istoryahanay agud mapabilin ang safety sang global trading sa rehiyon.
