ROXAS CITY-Ginpasalig ni City Councilor Midelo Ocampo nga liwat nga pagatutukan ang pagbaha sa pila ka mga mayor nga dalanon sa siyudad.
Sa interview sang Bombo Radyo sa kay Ocampo ginapahayag sini nga personal sini nga ginlibot ang siyudad sa kasagsagan sang ulan kun sa diin nakita sini ang sitwasyon sang mga dalanon nga ginabaha.
Suno sa kay Ocampo nga luyag sini usisaon sa talatapan sa City Engineers Office kun na-aksyonan na sang siyudad ang madugay na nga problema pag-abot sa baha.
Gindugang pa sini nga nakalab-ut naman ini nga problema sa atensyon ni Roxas City Mayor Ronnie Dadivas apang tubtob subong wala pa sang nakaigo nga solusyon nga gin-implementar agud mahagan-hagan ang pagbinaha-baha sa siyudad ihilabi na sa tion sang mamunog nga ulan.
Kasubong nga nahuya na si Ocampo sa mga pumuluyo nga naga-usisa sa iya sa tion nga magbinaha-baha sa siyudad.//
Suno pa sa kay Ocampo nga puno na ang iya sini nga facebook sang mga laragway sang mga ginabahaan nga lugar sa siyudad nga ginapadala pa sa iya sang mga apektado nga mga pumuluyo.
Samtang ginpasalig man ni Ocampo nga usisaon sini sa talatapan sang City Engineers Office ang estado sang pagbutang sang bag-o nga mga drainaige systems sa mga kabarangayan.
Suno sa kay Ocampo nga sa pinakaulihe sini nga pakig-angut sa kay City Engineer Noel Laminarez ginpahayag sini nga ginaproseso na sang siyudad ang pagbakal sang mga bag-o nga drainage systems apang tubtob subong wala pa sa guihapon na implementar.
Matandaan nga kalakip sa mga lugar nga ginbahaan kahapon nga adlaw kasunod sang mamunog nga ulan amo ang porsyon sang Barangay Tiza, Milibili, Mongpong, Lawaan, Barangay II kag iban pa
