ROXAS CITY – Nagpanugyan si City Councilor Midelo Ocampo sa publiko nga sundon ang ordinansa nga mandatoryo nga pagsuksok sang facemask kag faceshield sa oras nga maimplementar na ini sa siyudad sang Roxas.
Suno kay Ocampo nga ginduso nila ini nga ordinansa agud matapna ang pagsaka sang kaso sang COVID-19 sa siyudad sang Roxas.
Nagalaom si Ocampo nga kun mahimo nga magsunod na lamang ang mga pumuluyo bangud para man ini sa ikaayong lawas sang kadam-an.
Ginpahayag ni Ocampo nga tinutuyo sang nasambit nga ordinansa nga madugangan ang proteksyon sang mga pumuluyo.
Sa oras nga mapatuman na ini dapat bisan sa pampubliko nga mga lugar kinahanglan nga magsuksok sang facemask kag faceshield ang mga tawo.
Mahibaluan nga may yara sang nagakaigo nga penalidad kag multa sa mga magabayolar sa nasambit nga ordinansa.
Sarang nga magabayad sang P500 nga multa para sa first offense; P3,000 sa second offense kag P5,000 para sa third offense.
Samtang, ginahulat na lamang nila ang pirma sang local chief executive pinaagi kay City Mayor Ronnie Dadivas.
Samtang, pabor naman ang pila ka mga residente kag negosyante sa Burgos Street sining siyudad sa nasambit nga ordinansa.
Suno kay Manang Inday nga dapat lang ini nga i-implementar agud nga hilway ang tanan sa nasambit nga virus.
Dugang pa sini nga wala pa ini ginaduso nagasuksok na ini sang facemask kag faceshield agud mahilway man batuk sa nasambitan nga virus.
