ROXAS CITY – Ginpasalamatan ni City Councilor Midelo Ocampo ang mga katapo sang Capiz Electric Cooperatives (CAPELCO) kag iban pa nga mga electric cooperative matapos ang madasig nga pagbalik sang suplay sang kuryente sa syudad sang Roxas kag probinsya sang Capiz.
Bangud diri, magapapasar ini sang isa ka resolution nga naga-commend sa mga electric cooperatives nga naggikan sa pila ka mga lugar nga nagbulig sa Capiz Electric Cooperative (CAPELCO) agud mapadasig pa ang pagbalik sang suplay sang kuryente sa syudad sa tion nga may magluntad naman nga mga kalamidad.
Ginpahayag ni Ocampo nga sa sulod sang isa ka semana 50 porsyento na sang kuryente ang nabalik bangud sa pagbinuligay kag koordinasyon sang mga electric cooperatives nga nagpadulong sa syudad agud maghatag sang nagakaigo nga bulig.
