ROXAS CITY– Mahibaluan sa Lunes, Agosto 18, kun ano nga sahi sang bulig ang ihatag sang Roxas City Government sa mga tag-iya sang salakyan nga natumbahan sang fire tree sa kilid sang Roxas City Hall.
Sa interview sang Bombo Radyo kay Mr. Melvin Galagate, Head sang Roxas City Communications Group, iya ginpahayag nga na-identify na ang mga tag-iya sang salakyan nga natumbahan sang puno sa diin duha ka pribado nga salakyan ang naulamid kag mga motorsiklo.
Ang isa ka salakyan ang ginapanag-iyahan sang empleyado sang City Engineer’s Office samtang ang isa pa gid ka salakyan ang ginapanag-iyahan naman sang empleyado sang City Treasurer’s Office.
Suno kay Galagate, ginabanta yara na sa 40 anyos ang fire tree kag natukiban nga may dako na ini nga guang sa sulod sa diin daw kaangay nga panit na lang sini ang nagatindog kag ginalantaw nga indi na ini makabato pa kun may mabaskog nga huyop sang hangin. Ginapasalamatan sang natungdan nga wala sang tawo nga napilasan sa natabo.
