ROXAS CITY – Gilayon nga gina-aksiyunan sang pamunuan sang Roxas City Health Office ang mga ginapalab-ot nga reklamo sa ila natuhoy sa mabaho kag wala gina-mentinar nga mga babuyan sang pila ka residente.
Ini ang ginpahayag ni Marycris Labaniego sang nasambit nga talatapan sang mainterview sang Bombo Radyo.
Suno diri nga humalin sang Enero tubtob Hulyo, nagalab-ot na sa 20 ka mga reklamo ang ginpalab-ot sa ila magluwas pa ini sa wala na marekord matapos nga mahusay sa lebel sang barangay.
Ginpanindugan sini nga hugot nga ginadumilian ang pagpatukod sang babuyan sa mga residential areas sandig sa Presidential Decree 856.
Mahimo man suno diri maghupot ang isa ka pamalay sang isa ukon duwa ka baboy apang dapat nga mamentinar sini ang katinlo kag wala dapat ini nagatuga sang houl sa iya mga kasilingan.
Ginpahayag sini nga ang mabaho nga tangkal ukon babuyan ang mahimo magresulta sang pag-angkon sang asthma sa makahaklo sini kag pagduging sang langaw sa isa ka lugar nga posible man tunaan sang food borne diseases.
Nagapabilin naman nga bukas ang ila talatapan para sa mga luyag magreklamo bangud gilayon ini nila nga padulungan agud nga ma-tsekyar.
