ROXAS CITY – Ginatun-an sa karon sang gobyerno sang siyudad ang posibilidad sang pagpalawig pa sang lockdown sa Sitio Sakop, Barangay Culasi, Roxas City bangud sa padayon nga pagdugang sang kaso sang coronavirus disease (COVID-19).
Ini ang ginpahayag ni City Mayor Ronnie Dadivas sang mainterview sang Bombo Radyo.
Suno sa alkalde nga padayon ang ila close-monitoring kaupod ang City Health Office, City Disaster Risk Reduction and Management Office (CDRRMO) kag Inter-Agency Task Force (IATF) natuhoy sa sitwasyon sa amo nga lugar.
Posible suno sa iya antes ukon sa ika-14 ka adlaw sang lockdown sa nasambit nga sitio, maga-anunsiyo ini kun palawigon pa ang nasambit nga pagsulundan.
Kasunod sang pagdugang sang mga kaso sang amo nga sakit sa lugar ang pagpasangkad man sang contact-tracing efforts sang gobyerno sang siyudad.
Gilayon suno diri nga ginapaidalom sa rapid-test ang close-contacts sang mga naga-positibo kag sila ang gina-isolate.
Ginpasalig naman sang alkalde nga nakahanda ang gobyerno sang siyudad para sa bulig sa mga residente nga limitado ang pagguwa-sulod sa ila balay bangud sa lockdown.
Suno diri nga preparado ang gobyerno ilabi na pag-abot sa food security kun sa diin padayon ang paghatag sa ila sang bugas kag food packs.
Gindugang pa sang alkalde nga indi lamang gobyerno sang siyudad ang naga-desisyon sa pag-upgrade sang quarantine status sa Roxas City.
Kun ma-contain kag makontrol ang pagdamo sang kaso suno sa alkalde, indi na kinahanglan batakon pa ang quarantine classification sa siyudad apang kun padayon nga magtimbuok ang mga kaso, handa ini nga maghatag sang rekomendasyon sa IATF.
