ROXAS CITY, CAPIZ – Ginkumpirma sang Traffic Management Unit (TMU) nga ginpabayad sang penalidad ang traysikol drayber nga naghambal sa iya mga pasahero nga maglumpat samtang nagadalagan ang tricycle sa San Roque Street, Roxas City.
Sa interview sang Bombo Radyo Roxas kay Mr. Gonzalo Andrada, iya ginpahayag nga ginparahan kag ginsita sang TMU personnel ang colorum nga tricycle nga sakay ang tatlo ka menor de edad nga estudyante apang sa baylo nga magpondo, ginhirit pa ini padalagan sang driver.
Gilayon naman ini nga ginlagas sang TMU personnel kag naabtan sa San Roque Street.
Tuman naman ang kakulba sang mga estudyante nga pasahero sa ginhimo sang driver kag ginhambalan pa ang mga ini sang driver nga maglumpat.
Nahibaluan nga halin sa isa ka eskwelahan sa Barangay Tiza ang tatlo ka estudyante.
Sa karon, ginpapanaugan na sang penalidad ang driver kag gin-impound ang iya tricycle.
Panugyan ni Andrada sa mga pasahero nga indi magsakay sa tricycle nga wala sang city number.
Nahibaluan nga base sa record sang Traffic Management Unit halin Enero tubtob Hunyo sini nga tuig, nagapanguna nga nadakpan nga nagalapas sa ordinansa sang syudad amo ang mga colorum nga tricycle.
– Interviewed by: Bombo Sunnie Mae Constantino Batencila
