Nagkasugot ang Commission on Elections (Comelec) kag National Bureau of Investigation (NBI) nga pabaskugon sini ang pagpakig-angut para siguruhon nga bantay-sarado ang seguridad sang 2025 midterm election.
Sa nangin press conference nanday Comelec Chairman George Erwin Garcia kag NBI Director Jimmy Santiago, nagkasugtanan ini nga pasangkaron kag pabaskugon ang cyber security sang Comelec kontra sa mga may luyag maghimo sang gamo sa election kag sa iban pa.
Pahayag ni Santiago, luyag sang NBI nga magpakig-angut kag magpakigtingub sa Comelec agud masiguro nga may isa ka malimpyo kag matawhay nga election.
Suno man kay Garcia, magaperma ang Comelec sang isa ka Memorandum of Understanding sa NBI sa masunod nga mga inadlaw agud mapalig-on ang kaangtanan sini sa isa kag isa.
Nagapasalamat man ang Comelec sa igahatag nga bulig sang NBI nga kun sa diin makasigurado ang publiko nga wala sang mangin problema ang midterm elections.
