ROXAS CITY – Ginhangkat ni Capiz Capiz 2nd District Congressman Fredenil Castro si Senador Panfilo Lacson nga hingadlan ang source sini sa alegasyon nga may ipasulod nga pork barrel fund ang Kamara sa 2020 proposed national budget.
Ini ang kasunod sang ginbuyagyag ni Lacson nga para sa mga Deputy speakers ang hirit nga dugang nga 1.5 bilyones pesos nga budget sang manubo nga panalgan sang Kongreso.
Suno kay Castro, wala sila nakahibalo sang mga kaupdanan sini nga mga mamalidha kun ano ang basehan ni Lacson sa iya mga alegasyon.
Dapat suno sa kongresista magbulig sa ila ang senador agud mahibaluan ang kamatuoran.
Gindugang pa sini nga magluwas sa parliamentary courtesy, constitutional duty man ni Lacson nga hibaluon kun matuod ang nakuha sini nga impormasyon antes ini ipaguwa sa publiko.
Suno sa kongresista naguba ang reputasyon sang Kamara bangud lamang sa mga impormasyon nga ginpaguwa sang senador nga wala pa man sang basehan.
