ROXAS CITY – Malipayon nga nagpahayag sang pagpasalamat si Congressman Tawi Billones, matapos nga liwat ini nagdaog sa iya kandidatura bilang Congressman sang 1st District sa probinsya sang Capiz.
Sa interview sang Bombo Radyo kay Cong. Billones, nagapasalamat ini sa tanan nga mga pumuluyo sang primero distrito nga naghatag sang pagsalig sa iya kag sa tanan man nga sektor nga nagsuporta sa iya kandidatura.
Ginpromisa man ni Billones nga padayunon niya ang paghimo sang maayo kag sinsero nga serbisyo sa tanan nga mga pumuluyo kag padayunon man ang pagtukod sang mga proyekto nga mapinuslanon.
Mahibaluan, nga majority sang partido liberal ang nagmadinalag-on sa subong nga eleksyon.
Ginpahayag man sini nga ginakalipay gid sang ila bug-os nga partido ang resulta sang ginhiwat nga pagpiniliay kahapon nga adlaw, Mayo 9.
Ginpabugal man ni Billones ang kandidato nga ila ginsuportahan sa banwa sang Pontevedra nga si punong barangay Henry Tumlos kun sa diin ini ang nagdaog sa pagka-mayor.
Suno sa Congressman, wala nila ginalauman nga makuha nila ang mataas nga boto sa nasambit nga banwa bangud balwarte ini sang ila kasumpong.
Nagpahayag man ini sang pagpasalamat sa mga pumuluyo sa banwa sang Maayon bangud nagapabilin nga mayor si Mon-mon Malapajo. Dugang pa sa ginpasalamatan ni Billones ang pumuluyo sang Panitan, Pontevedra, Pres. Roxas kag syudad sang Roxas.
