Ginsaysay ni Congressman Howard Guinto ang iya mga prayoridad nga mga proyekto nga nagatuyo nga mapaayo ang kalidad sang serbisyo publiko kag mapabakod ang ekonomiya sa banwa sang Panay.
Suno sa iya, ang pinakauna nga proyekto amo ang pagtukod sang bag-o nga Municipal Hall. bangud kinahanglan sang banwa ang mas lapad, moderno, kag mas epektibo nga pasilidad para sa mga serbisyo sang gobyerno.
Dugang pa sini, nga ginaplano man ang pagtukod sang bag-o nga pampubliko nga merkado, kasunod sang pagdamo masyado sang mga manugnaligya kag bumalakal rason naga gutok na ang merkado kag nagatuga sang trapiko.
Ang bag-o nga merkado ginatuyo nga mangin mas lapad, mas accessible sa publiko, kag indi na magpabudlay sa mga konsumidor kag motorista.
Ginahatagan man atensyon ni Congressman Guinto ang sektor sang pagpangisda, pinaagi sa re-development sang Pawa Fishing Port. Lakip sini ang pagtukod sang food storage facilities kag seafood market; nga magabulig sa mga mangingisda kag masiguro ang husto nga supply sang pagkaon sa lugar.
Sa edukasyon naman, ginaplanuhan man ang pagdugang sang mga classroom sa mga pampublikong eskwelahan, bangud sa nagadamo nga enrollees kada tuig.
Mensahe ni Congressman Guinto, ang tanan nga ini nga mga proyekto kabahin sang iya inisyatibo nga mapasangkad ang pag-uswag kag kabuhi sang mga pumuluyo indi lang sang mga taga Panay kundi sang bug os nga probinsya sang Capiz.
Interviewed by: Bombo Francis Biñas
