ROXAS CITY-Nagpa-athag ang talatapan sang City Social Welfare and Development Office ukon CSWDO natuhoy sa reklamo sang pila ka mga residente nga wala makabaton sang tunga sa sako nga bugas sa Barangay Libas, Roxas City.
Sa interview sang Bombo Radyo kay Mr. Perseus Cordova ginpahayag sini nga gikan sa 1,406 nga ginlista sang mga barangay officials, yara lamang sa 1,385 ka mga residente ang nahatagan sang bugas.
Gin-athag pa ni Cordova nga wala sang may ginbuhin ang talatapan sa ginsumter nga listahan sang mga barangay officials, apang aminado ini nga may yara sang wala makabaton nga residente bangud ginpaidalom ini sa maid-id nga validation.
Nahibaluan nga ginapalabi nga hatagan sang bugas ang mga indigent nga wala sang ikasarang kadungan sang ginapangatubang nga pandemiya.
Magluwas diri, may yara sang mga nakalista nga residente nga nakabaton na sa iban nga mga kabaranggayan.
Samtang, ginpangabay naman ni Cordova nga magpadulong sa talatapan sang CSWDO ang mga wala makabaton sang tunga sa sako nga bugas.
Matandaan nga kapin sa 21 ka mga residente sang nasambit nga barangay ang nagreklamo matapos nga wala makabaton sang tunga sa sako nga bugas.
