Plano sang Department of Agriculture nga maglunsyar sang isa ka importante nga tikang padulong sa mas mataas nga lebel sang transparency kag accountability paagi sa paglunsyar sang Transparency Portal nga pagatawgon nga Farm-to-Market Road Watch.
Suno sa DA, ang Farm-to-Market Road Watch isa ka plataporma nga magaserbe nga sentro sang impormasyon para sa tanan nga mga proyekto nga Farm-to-Market Road (FMR) nga ginapatigayon sa nagkalain-lain nga bahin sang pungsod.
Bilang paghanda sa pormal nga paglunsyar, ang DA-Bureau of Agricultural and Fisheries Engineering (BAFE) nag-preview sang beta version sang Farm-to-Market Road Watch sa mga stakeholders kag publiko.
Katuyuan sini nga tikang amo ang pagtipon sang feedback kag pagsiguro sang kahanda sang portal antes ini lubos nga mapatuman.
Paagi sa Farm-to-Market Road Watch, mangin mahapos para sa publiko nga makita kag marepaso ang mga importante nga detalye sang tagsa ka proyekto sang Farm-to-Market Road.
Kalakip sang mga detalye ang eksakto nga lokasyon sang proyekto, ang ngalan sang kontraktor nga responsable sa trabaho, ang kabug-usan nga gasto sang proyekto, ang petsa nga ginsugdan ini, kag ang subong nga accomplishment rate.
Dugang pa sang natungdan, ang tagsa ka proyekto may yara man sang QR code nga magatugot sa mga interesado nga partido nga direkta nga ma-access ang kompleto nga profile sang proyekto kag mga dokumento nga may kaangtanan sa proseso sang bidding.
Target man sang ahensya nga tutukan sang DA ang masobra 1,000 ka mga pending FMR projects nga nagsugod sang tuig 2021 kag ginalauman nga matapos kuntani sang 2025.
