ROXAS CITY – Nagdangop sa Roxas City Police Station ang isa ka dalaga matapos nabiktima sang snatcher sa Pueblo de Panay, Barangay Lawaan, Roxas City.
Ang wala na ginhingadlan nga biktima ang naga-edad sang 18 anyos kag residente sang Barangay 10, Roxas City.
Suno sa iloy sang biktima, naga-jogging ang biktima kaupod ang 14 anyos nga manghod sini kag iya pakaduha nga lalaki sa amo nga lugar.
Apang pag-abot sa kilid sang isa ka mall sa nasambit nga lugar, hinali na lamang nga may nagpundo nga Mio nga motorsiklo nga nagaduag puti kag itom sakay ang wala makilala nga lalaki.
Diri kag ginkuha sang suspek ang cellphone sang biktima apang ang ginkalain sang buot sang iloy, gin-uyatan pa kag ginkumos sang suspek ang dughan sang iya nga anak.
Magluwas diri ginluok pa sang suspek ang nasambit nga biktima.
Kumbinsido man ang biktima nga nakakilala sa iya ang suspek bangud posible suno diri nga tuyo siya sini nga bastuson magluwas sa kuhaon ang iya nga cellphone.
Ginapahayag nga may tagsa ka cellphone man ang mga kaupod sang biktima apang wala man ini ginkuha sang suspek.
Sa karon, padalman pa sang Roxas City Police Station ang ila imbestigasyon sa amo nga insidente.
