Nagdangat na sa 16 ang napatay sa ikaduha nga adlaw sang inaway sa tunga sang Thailand kag Cambodia.
Kapin sa isa ka gatos ka libo ka mga tawo ang gin-evacuate man sa mga evacuation centers halin sa border sang duha ka pungsod.
Nagpaandam man ang Thailand nga mahimo magdaku pa sa giyera ang ila inaway sa Cambodia.
Una nga nagluntad ang inaway sa tunga sang duha ka pungsod sang Hulyo 24 matapos nga naglunsar sang pag-atake ang Cambodia gamit ang magagmay nga armas kag mabug-at nga armas rason nga nagbalos ang Thai army paagi sa artillery fire.
Ang inaway natabo sa duha ka lokasyon sa probinsya sang Ubon Ratchathani kag isa sa probinsya sang Surin, suno sa impormasyon gikan sa Thai Army. Ginpaandaman man sang militar ang ila mga pumuluyo nga likawan ang lugar bangud sa mga report nga may mga heavy weapons kag rockets nga ginpalupok halin sa Cambodia.
Nagmarka ini sang isa ka dramatiko nga pagdugang sang tensyon sa tunga sang duha ka pungsod, nga naga-ambit sang dulunan sa duta nga kapin sa 800 kilometros.
Ang duha ka pungsod may madugay na nga pagbinaisay sa dulunan nga naghalin sa isa ka mapa sang 1907 nga gindrowing sa idalom sang kolonyal nga paggahom sang Pransia nga gingamit sa pagpain sang Cambodia gikan sa Thailand. Ginagamit sang Cambodia ang mapa bilang basehan sang ila ginaangkon nga teritoryo, apang wala ini ginakilala sang Thailand kag nagapanindugan nga indi ini husto.
Pila ka mga pungsod ang nagahingyo sa Thailand kag Cambodia nga untaton ang inaway, lakip na ang Estados Unidos, China, Australia kag Association of Southeast Asian Nations (ASEAN).
