Naglab-ot na sa 127 ang numero sang mga napatay sa Vietnam sa paglaslas sang Typhoon Yagi sa Vietnam.
Napilitan naman nga magbakwit ang yara sa 59,000 nga residente sa Yen Bai province suno sa mga lokal nga otoridad matapos nga malikop sang baha ang halos 18,000 nga kabalayan.
Ang tubig baha naman sa Hanoi, ang capital city sang Vietnam, ang naglab-ot na sa mga lebel nga wala pa naeksperyensyahan humalin sadtong 2008. May pila man ka lugar sa Thai Nguyen province ang lab-ot na sa liog ang tubig baha.
Nagapabilin nga missing ang yara sa 54 nga indibidwal.
Samtang, padayon naman ang pagpangita sang mga awtoridad sa walo (8) ka iban pa nga missing sang natiphag ang sentro nga bahin sang Phong Chau bridge sa may Red River sa central Hanoi sang Martes. Nasalbar naman ang lima (5) ka persona nga nagaagi sa tulay sang matabo ang insidente.
Una na nga nag-igo ang bagyo sa nasambit nga pungsod sadtong adlaw sang Sabdo nga nagadala sang mga paghangin nga lapaw sa 149 kilometers per hour.
